Isabel Muñoz fará un percorrido polo seu traballo fotográfico, centrándose nos seus últimos proxectos, entre os que destacan un achegamento á cultura xaponesa, a natureza e a contaminación baixo a auga dos nosos mares e océanos e, mais recentemente, unha investigación sobre as orixes da humanidade ao través dos vestixios que nos deixaron as antigas civilizacións.

Isabel Muñoz é unha das fotógrafas mais destacadas da escena contemporánea. A súa paixón polo corpo humano como forma de achegamento á complexidade da persoa, a súa mirada ao través de distintas culturas e o seu compromiso social fan dela un referente na fotografía actual. Tamén destaca o seu desenvolvemento da técnica da platinotipia e do gran formato para reforzar o seu discurso.

Obtivo o Premio Nacional de Fotografía en 2016, é Académica da Real Academia de Bellas Artes de San Fernando desde 2022, e gañou en dúas ocasións o World Press Photo, entre outras moitas distincións. A súa obra está presente nas principais coleccións, entre elas o MNAC Reina Sofía, o Museo do Prado ou a Maison Européene de la Photographie en París.

‍